Jo, nuk e keni imagjinuar që vendet në sediljet e linjave ajrore janë bërë më të ngushta. Edhe unë, e kam ndjerë atë vështirësinë në akomodim, bashkë me udhëtarë të tjerë ngjitur me mua, ndonëse peshoj 60kg. Dhe kam pyetur veten: Kaq të ngushta kanë qenë gjithmonë?
Madhësia e sediljeve sigurisht që nuk kanë qenë në këto përmasa, por gradualisht, për më shumë se 25 vjet, kanë ndryshuar.
Vendet më të ngushta janë më shumë se thjesht një parehati fizike, ato janë një kërcënim për shëndetin tuaj, madje edhe për jetën tuaj nëse ka një evakuim emergjent nga kabina e avionit. Në vitin 2018 Administrata Federale e Aviacionit (FAA), së bashku me agjencinë qeveritare përgjegjëse për sigurinë e fluturimit të publikut në SHBA, vendosi standardet minimale të madhësisë së sediljeve, me qëllim ruajtjen e sigurisë së pasagjerëve.
Si pjesë e procesit për të vendosur se cilat duhet të jenë dimensionet minimale të sediljeve, FAA së fundmi kërkoi komente publike nga udhëtarë të linjave ajrore. Nëntorin e vitit të shkuar u mbyll anketa dhe agjencia mori më shumë se 26 mijë komente jashtëzakonisht negative, duke detajuar pse vendet aktuale të linjave ajrore janë të parehatshme, paraqesin rreziqe për shëndetin dhe nuk janë të favorshme për sigurinë e pasagjerëve.
Ka disa arsye pse avionët me shumë udhëtarë dhe sedilje të vogla mund të shkaktojnë probleme:
- Komoditeti: Sediljet e vogla mund të jenë pak të ngjeshura dhe të kufizuara në hapësirë. Kjo mund të bëjë që udhëtarët të ndjehen në siklet për lëvizjen më të vogël dhe të pakënaqur, sidomos gjatë fluturimeve të gjata. Mungesa e hapësirës personale dhe qëndrueshmëria e kufijve të sediljeve mund të shkaktojë vështirësi për të qëndruar rehat në një pozicion të duhur gjatë fluturimit. Imagjinoni pak kur ka udhëtarë edhe me probleme të caktuara fizike, sa e vështirë bëhet.
- Mbingarkesa: Avionët me sedilje të vogla zakonisht kanë në kapacitetin e tyre më shumë udhëtarë në të njëjtën hapësirë. Mbingarkesa e aeroplanit mund të çojë në reduktim të hapësirës për qarkullim të lirë dhe vështirësi në emergjenca në rast nevoje.
- Siguria: Në raste emergjence, siç janë turbulenca e fortë, ndërprerje e rrymës së ajrit ose braktisje e detyruar, hapësira e kufizuar dhe ndarja e ngushtë midis udhëtarëve mund të krijojë pengesa në evakuimin e shpejtë të avionit. Kjo situatë mund të rrisë rrezikun për të gjithë pasagjerët.
Standardi i madhësisë së sediljeve në linjat ajrore ndryshon në varësi të kompanisë ajrore dhe tipit të avionit. Megjithatë, për shumicën e avionëve të linjave ajrore të mëdha, standardi i zakonshëm për një sedilje ekonomike është rreth 43-47 cm në gjerësi dhe rreth 76-86 cm në distancë midis sediljeve. Ndërsa, në klasin e parë, atë të biznesit, sediljet janë më të gjera dhe ofrojnë më shumë hapësirë personale për udhëtarët. Madhësia e tyre varion shumë në varësi të linjës ajrore dhe avionit, por zakonisht ofrojnë më shumë se 50 cm në gjerësi dhe më shumë se 96 cm në distancë midis sediljeve.
Kësaj tendence për të ngushtuar sediljet dhe shtuar numrin e vendeve në avionë duhet ti shtojmë edhe tendencën e rritjes së numrit të personave obezë në popullatë. Kjo situatë ka shkaktuar sfida për udhëtarët dhe përvojën e tyre të udhëtimit. Rritja e prevalencës së obezitetit në popullatë mund të sjellë disa risqe në të ardhmen.
Për të përballuar këto sfida të marra së bashku, në të ardhmen, ka disa masa që mund të merren:
- Rishqyrtimi i rregullave dhe standardeve: Autoritetet e aviacionit dhe organizatat e sigurisë ajrore mund të rishikojnë dhe përditësojnë standardet për hapësirën personale dhe sigurinë në avionë. Kjo përfshin mundësinë e rritjes së hapësirës midis sediljeve dhe rishikimin e standardeve për evakuimin e pasagjerëve në emergjenca.
- Teknologji dhe dizajn i ri: Kompanitë ajrore dhe prodhuesit e avionëve mund të zhvillojnë teknologji dhe dizajne të reja që të përmirësojnë komoditetin dhe hapësirën në avion. Kjo mund të përfshijë ndryshime të strukturës së sediljeve, sisteme të rregullueshme për hapësirën midis tyre dhe dizajne më të përshtatshme për udhëtarët të të gjithë kategorive.
- Informim dhe këshillim për udhëtarët: Linjat ajrore mund të ofrojnë informacion dhe këshilla të mëtejshme për udhëtarët në lidhje me komoditetin, sigurinë dhe aspektet shëndetësore të udhëtimit. Kjo mund të përfshijë më shumë informacion rreth hapësirës midis sediljeve, që njerëzit të jenë të përgatitur, opsione për udhëtarë me një peshë mbi mesatare etj.